الطيب نورك جهرنا
عدد الرسائل : 13 العمر : 43 تاريخ التسجيل : 29/04/2008
| موضوع: أحســــــــــــــــــــــــــــــــــن ترحـــــــــــــــــــــــــــــل الأربعاء أبريل 30, 2008 4:25 pm | |
| أحسن ترحل ! الله معاك
أحسن ترحل !!! يمكن بُعدك يشفي غليل الفرحه الماتت في جوانا معاك .. فرحك غائب وانت معانا ... وانت مخبي علينا كتير من حزنك في جواك فاتح ليل الوحشه شوارع .. وشارد من عِصيان الدمعه.. وحابس نفس الهم الطالع وهمك باين في محياك تشطب خط الفرح الزاهي .. تعبي سواد الحبر الجفّ.. وترسم فوق أوراقك ضفه بتحضن حزنك قبل رضاك تزحف وهمك ظاهر ومخفى .. أخفى حنينك .. خلى إحساسك باهت ومطفي وحاجب عن الفرحه هواك ويبقي سؤالي التايه برضك كيف حتلاحق رزم الغربه ؟ وفي جواك الهم مترهل والمشوار بلحيل هداك؟ واحسب عمرك ..كم باقيلك من عافيتك لما تجازف طالع ونازل وتفضل بين أحزانك واقف وكل عذابك ما كفاك ؟ وكيف تتحمل نار الفرقه وما تتألم؟ وانت فؤادك ذاتو مقسّم !! وانت أساساً سايب قلبك كلو هناك !! أحسن ترحل .. لم أحزانك كان تنجمّ.. وأنسى الناس الشايفه همومك وما بتهتمّ وقاعده بتحسب في أوراقها وتتخطاك لم إحساس جواك يترنّح .. وباقي فؤاد بالشوق اتجرّح .. اعكس خط الغربة الطالع وشيل الشيله الواقفه حِداك يمكن يمرق وجع الهم البارى سنينك ... ولا يزيد تبريحو حنينك .. ويشفع جُرحك ولا أنينك عارفك صابر وقاسي بُكاك وبرضو كلام الناس ما ساكت !.. قالوا عناد الجرح الغاير .. وكاتم وجعك ساكت صابر..ووجعك راحل شان يرجاك ! وآخر مرة لمحتك فيها كان جواك الشوق مدفّق .. وبان في عيونك لما يشفّق .. إطمنت بانك راجع.. أوعّ يكـون الشوق خلاك؟ كان قلبّت علينا مواجع وانت تباصر مخرج راجع رامي الغربه وليلها الكالح وكل سنين الهجرِ وراك قوم اتلافى شقوق الفرقه.. قبل فؤادك ما يتورط .. وقبل حنينك ما يتوهط ،وقبل رحيلك من دنياك أنسى الجرح الطوّل غائر .. وكل هموم الحظ العاثر افرد سيفك حد الرؤية وشق الزمن الاتحـداك فوت البلد الكاتم نفسك .. كتم البحر الأكبر منك .. وكاتم كل إبداعك وفنك..وساجن فرحك جوه غناك قوم اتوكل يمكن تلقى نداوة فرحه يغطي رزازها يباب الوحشه.. وتفتح تاني مداخل دهشه .. تخلي عيون الغيم الضاحك ..تضحك اكتر يوم تلقاك وانت مكانك ما في الغربه... جنب القمر الضوّى الدنيا ... وسط الغيم الراحل غنيه.. وبين النيل والنسمة لقاك تنسج وهج النجم الساهر وتحزم نور الصـبح الباهر وتهمس فكرك باطن وظاهر.. فايق ورايق ما همــاك قوم اتحزم هم الرجعه .. وطلعة عقبه ..وكم تغريزه عنيده وصعبه وطول السكة نزيف أشواك قدرك وفرضك ... ما تتردد.. واصل برضك أمشي وأزحف .. ما تتوقف .. آخر شهقه في ليل الوحشه..تلقى عيونهم تستناك .. أحسن ترحل ... الله معاك ... | |
|
الوضاح رئيس مجلس الاداره
عدد الرسائل : 107 العمر : 36 تاريخ التسجيل : 02/03/2008
| موضوع: رد: أحســــــــــــــــــــــــــــــــــن ترحـــــــــــــــــــــــــــــل الأربعاء مايو 07, 2008 10:29 am | |
| | |
|